Э, ТАНБАЛИ АҲОРӢ

— Э, танбали аҳорӣ,
Дар каллаат чӣ дорӣ?
— Телпаки барра дорам —
Қарокӯли бухорӣ.

— Э, танбали аҳорӣ,
Таги телпак чӣ дорӣ?
— Тоқии шоҳӣ дорам,
Бодомгули ҳисорӣ.

— Э, танбали аҳорӣ,
Таги тоқӣ чӣ дорӣ?
— Таги тоқӣ мӯ дорам
Чун кокули ҷуворӣ.

— Э, танбали аҳорӣ,
Таги мӯят чӣ дорӣ?
— Аз таги мӯ сарам ҳаст,
Нигаҳ магар надорӣ?

— Э, танбали аҳорӣ,
Дар мағзи сар чӣ дорӣ?
— Худам чизе надидам,
Бидеҳ ба ман ту ёрӣ.