ЧӢ КОР ДОРӢ?
... ки маро намешиносӣ, ту ба ман чӣ кор дорӣ?
...ки ба зери остинат на яке, ду мор дорӣ?
...чӣ бадӣ зи ман бидидӣ, чӣ ситам зи ман кашидӣ?
...ки чунин зи ман буридӣ... чу шутур маҳор дорӣ...
...ки на аҳли аҳду паймон, ки на аҳли дарду дармон,
...ки набуда марди майдон ба чӣ ифтихор дорӣ?
...ки ба ними рӯ даҳоне, ба даҳон ду газ забоне,
...ки ба резагор ҷоне ғами рӯзгор дорӣ...
...ки маро намешиносӣ... ки туро намешиносам...
...ки биё, агар ба қалбат хабар аз баҳор дорӣ...
Тошканд, 29 феврали соли 2020
ЧӢ КАРДӢ?
Ту бо боли бикшодаи ман чӣ кардӣ?
Ба парвози омодаи ман чӣ кардӣ?
Наосуд як лаҳзае аз тапидан,
Фалак, бо дили содаи ман чӣ кардӣ?
Магар б-озодагонат ин буда паймон?
Ту бо руҳи озодаи ман чӣ кардӣ?
Ба хамёзаҳои гул обод буд,
Ба печу хами ҷодаи ман чӣ кардӣ?
Дари айш бастӣ, диламро шикастӣ,
Ба паймонаву бодаи ман чӣ кардӣ?
Лагадкӯби сумми сутурон намудӣ,
Ту бо килки афтодаи ман чӣ кардӣ?
Рабудӣ зи каф дурри мақсуди дилро,
Ба ганҷи худододаи ман чӣ кардӣ?
Тошканд, 30 феврали соли 2020