Ба қадри умр мерас, то тавонӣ,
Ки бо ту ҳамсафар умр аст, умр аст.

---

Ба ҳар кӣ дил кушодам, шуд гурезон,
Касе дигар ба сӯйи ман шитобон.
Умеде гар накардам ҳаргиз аз ӯ,
Ба сони шамс бар ман шуд дурахшон.

---

Зи худ то кай гурезӣ, эй азизам,
Ба худ то кай ситезӣ, эй азизам?
Ба пеши марду номард обрӯят
Ту худ то кай бирезӣ, эй азизам?

---

Натонӣ иттикои ҳар кӣ будан,
Ба ҳар дарде давои ҳар кӣ будан.
Сипар кардан сари сина нашояд
Ба ҳар кас, ошнои ҳар кӣ будан.

---

Надонад қадрат ар мардум, чӣ чора?
Ба неши мор ё каждум чӣ чора?
Худо донад накӯиҳоят, эй дӯст,
Агар арзан диҳад гандум, чӣ чора?