Зулфия Мӯъминова

ӮЗБЕК ВА ТОҶИК

Ногоҳ чакад зи чашми тоҷик ашке,
Дарҳол давон шавад ба сӯяш ӯзбек.
Аз дидаи ӯзбек чакад ашке гар,
Дарҳол равон шавад ба сӯяш тоҷик.

Дунёи дурӯғ, чӣ дидаӣ дар олам?
Ӯзбек дуо кунад барои тоҷик.
Ҳарчанд нагӯянд ғамашро, хонад
Бинмуда назар ба чашмҳои тоҷик.

Даъват кунад ӯзбек, ки боз о, эй дӯст!
Бар кӯҳ шавад савору ояд тоҷик.
Дар хонаи тоҷик бигиряд тифле,
Бо шири сафеди худ бипояд ӯзбек.

Бар хонаи тоҷик занад санге кас,
Дастони варо кашад ба пойин ӯзбек.
Ӯзбек ба зери бори ғамҳо монад,
Бар дарду ғамаш чора биёбад тоҷик.

Дунё ба кадом сӯ биравад, кай донам?
Ӯзбек куҷо ҳаст, биёяд тоҷик.
Бархонда зи Ҷомию Навоӣ шеъре,
Тоҷик куҷо ҳаст, биёяд ӯзбек.
Бобур Бобомурод
ОРМОН
Ормонам на суман буд,
Не гулу боғу чаман буд.
Душманон оҷизу қасдам,
Душмане ҳамтани ман буд.
Гашта олуда тану ҷон,
Қасди ман пок бадан буд.
Ормонам зи хушиҳо,
Ёру оҳангу сухан буд.
Хайли ҷин ҳамдами ман , кош,
Ёсуман дилбари ман буд.
Ормонам: чу туморе
Дилнишин, тоза сухан буд.