Пардохти рухсатӣ на дертар аз як ҳафта пеш аз оғози он тибқи моддаи 112 КМ ҶТ ва ҳисоб кардани музди миёнаи меҳнат барои пардохти рухсатӣ ва пардохти ҷубронпулии рухсатии истифоданашуда бошад, тибқи қоидаҳои моддаи 118 КМ ҶТ амалӣ карда мешавад.

Рухсатии меҳнатиро бо мувофиқаи корманд ва корфармо ба қисмҳо ҷудо кардан мумкин аст, ки яке аз қисмҳои он набояд аз 14 рӯзи тақвимӣ камтар бошад. Аз рухсатии меҳнатӣ бозхондан танҳо бо розигии корманд мумкин аст. Ҳангоми бозхондан аз рухсатии меҳнатӣ қисми истифоданашудаи рухсатӣ бояд ба корманд дар давоми ҳамон соли корӣ дар вақти бароиш мусоид дода шавад ва ё ба рухсатии соли кории ояндааш бо риояи талаботи пешбининамудаи моддаи 108 КМ ҶТ илова гардад, агар дар созишнома ва шартномаҳои коллективӣ дигар ҳолатҳо пешбинӣ нашуда бошанд. Аз рухсатии меҳнатӣ бозхондани кормандони аз ҳаждаҳсола хурд ва кормандоне, ки дар шароити барои саломатӣ зарарноек, хавфнок ва вазнини меҳнат кор мекунанд ё корашон хусусияти махсус дорад, инчунин дигар шахсон дар ҳолатҳои дар қонунгузории Ҷумҳурии Тоҷикистон пешбинишуда мумкин нест (моддаи 111 КМ ҶТ).

Рухсатии пардохтшавандаи ҳарсола тибқи созишномаи байни корманд ва корфармо ба мӯҳлати дигар мавқуф гузошта мешавад, агар корманд маблағи рухсатии пардохтшавандаро нагирифта бошад ё корманд дар бораи вақти оғози рухсатӣ дертар аз ду ҳафтаи пеш аз оғози кор огоҳ карда шавад.