соҳаи хизмати давлатӣ ва суд баррасӣ карда мешаванд.

Мутобиқи Қонуни Ҷумҳурии Тоҷикистон "Дар бораи вазъи ҳуқуқии хизматчиёни ҳарбӣ" аз 1 марти соли 2005, № 90, муҳлати қарор доштани шаҳрвандон дар хизмати ҳарбӣ бо тартиби ихтиёрӣ ба собиқаи умумии корӣ ва ба собиқаи кор аз рӯи ихтисоси онҳо аз ҳисоби як рӯзи хизмати ҳарбӣ баробар ба як рӯзи корӣ ҳисобида мешавад, муҳлати қарор доштани шаҳрвандон дар хизмати ҳарбӣ мувофиқи даъват (аз ҷумла афсароне, ки ба хизмати ҳарбӣ даъват мешаванд) бошад, - як рӯзи хизмати ҳарбӣ баробар ба ду рӯзи корӣ ҳисоб карда мешавад. Бо қарори Ҳукумати Ҷумҳурии Тоҷикистон аз 3 декабри соли 2010 № 634 «Дар бораи Қоидаҳои тартиби таъминоти нафақавии касбӣ», собиқаи кории махсусро, ки ба нафақаҳои касбии имтиёзноки пеш аз муҳлат ҳуқуқ медиҳад, муқаррар намудааст. Бо Фармони Президенти Ҷумҳурии Тоҷикистон аз 20 ноябри соли 2010, №952, тартиби ҳисоб кардани иловапулӣ барои собиқаи хизматии кормандони мақомоти гумруки Ҷумҳурии Тоҷикистон ва андозаи он тасдиқ шудааст, ки тибқи он собиқаи хизматии кормандони мақомоти гумруки Ҷумҳурии Тоҷикистон барои гирифтани кафолатҳои зерини иҷтимоии мақомоти гумрук асос шуда метавонад: иловапулӣ барои собиқаи хизматӣ; рухсатии иловагии ҳарсолаи пардохтшаванда; баромадан ба нафақа тибқи қонунгузории Ҷумҳурии Тоҷикистон; кӯмакпулии яквақта дар сурати ба нафақа баромадан; таъйин шудан ба мансабҳои маъмурии хизмати давлатии категорияҳои дахлдор.