Шартномаи муҳлатноки меҳнатӣ бо талаби корманд дар ҳолатҳои беморӣ ё маъюб шудани ӯ, ки барои аз рӯи шартномаи меҳнатӣ иҷро намудани кор халал мерасонад, аз ҷониби корфармо вайрон кардани муқаррароти Кодекси меҳнат ва дигар санадҳои меъёрии ҳуқуқии Ҷумҳурии Тоҷикистон ё шартномаи меҳнатӣ, инчунин бо дигар сабабҳои узрнок бекор карда мешавад.

Қонунгузорӣ ба корманд ҳуқуқи яктарафа бекор намудани шартномаи меҳнатиро додааст. Яктарафа бекор кардани шартномаи меҳнатӣ аз ҷониби корманд бе огоҳии пешакӣ қатъ намудани он ифода мегардад. Асосҳои яктарафа бекор кардани шартномаи меҳнатӣ аз ҷониби корманд инҳоянд:

• агар ҳангоми бастани шартнома корфармо дар бораи шароити меҳнат дар ҷойи кор ба ӯ маълумоти нодуруст дода бошад;

• агар корфармо уҳдадориашро оид ба таъмини ҳифзи меҳнат ва бехатарии меҳнат дар ҷойи кор вайрон карда бошад.

Дар дигар ҳолатҳо КМ ҶТ яктарафа бекор намудани шартномаи меҳнатиро аз ҷониби корманд манъ намудааст.

Яке аз зеринститутҳои асосӣ ва муҳими институти шартномаи меҳнатӣ ин бекор кардани шартномаи меҳнатӣ бо ташаббуси корфармо мебошад. Мавзуи мазкур дар амалия баҳсҳои зиёди меҳнатиро дар судҳо ба вуҷуд меорад. КМ ҶТ (моддаи 42) бист номгӯи мушаххаси асосҳои бекор кардани шартномаи меҳнатиро бо ташаббуси корфармо муқаррар намудааст. Вале, ин