Эй ҷӯра, ту ҳай аз ҳама боло шиштӣ,
Мастона магар баҳри тамошо шиштӣ?
Бедонаву сайду кабку гунҷишк хӯрӣ,
Чун мо чӣ шавад, ки нонаки хушк хӯрӣ?

Дар шишаи ях задем бар тахтаи пушт,
Ӯ кист, ки рӯзгор-ш дар тахта нашушт?
Дар тахтаи барф пушти худ молидем,
Бар лаб бигирифта мушти худ нолидем.

Партофт маро яхи кабуди Ватанам,
Оҳам ба ҳаво рафт чу дуди Ватанам.
Эй дӯст, барои Ватанам месӯзам,
Номи Ватанам дар даҳанам месӯзам.

Фарёд зи дастат, эй зимистони хунук,
Дасте нашикастат, эй зимистони хунук.
Гар хонаи мо гарм шавад, мешиканӣ,
Чун мӯйсафеди дар навад мешиканӣ.

Фарёд, ки устухони мо месӯзад,
Дил сӯхта асту ҷони мо месӯзад,
Дар чарх дигар фиғони мо месӯзад,
Ин хок чӣ? Осмони мо месӯзад!

Сармозадаем, даст бар мо нарасон,
Дастат ба гуле шикаст сармо, нарасон.
Резад гули бишкаста, агар даст расад,
Резад дили бишкаста, агар даст расад.

Дасте нарасон ба мо, ки сармозадаем,
Аз сӯзиши дард сар ба дарё задаем.
Сӯзи дили моро яхи дарё нашикаст,
Аз сӯзи дили мо яхи дарё бишикаст.