КАБКИ САРИ ЧАШМА

Дар пуштаи хоби мардумон сабза дамид,
Кас дар ҳама сол ончунон сабза надид.
Бингар ту ба гову хар, чӣ сон сабза чарад,
Ин хоб чаро зи чашми мардум напарад?

Ту дар бади мо задӣ, задӣ дар бади мо,
Сад шуд яки ту охиру як шуд сади мо.
Охир ба ҳазору сад расад яксади ту,
Чун бар яки мо расид чашми бади ту?

Эй дӯст, ғаму дарди туро медонам,
Бо дард рухи зарди туро мехонам.
Мехонаму месӯзаму менолам, вой,
Во сина ба хоки сард мемолам, вой.

Эй об, ғами маро бигӯ об дар об,
Як дӯст, Худо, бошаду як хумби шароб.
Бо нолаи чангу найу дутору рубоб
Нӯшему бинолем аз ин ҳоли хароб.

Эй дӯст, марав, марав, ки ман ғамгинам,
Як дам бинишин, ки дар барат биншинам.
Бо дӯст гули тар аз чаман мечинам,
Бе дӯст ғарибу зораму мискинам.

Аз дарди дилу ҷону ҷигар месӯзам,
Аз оташи ду дидаи тар месӯзам.
Месӯзаму мепечаму мерезам, вой,
Дубораи ду зи ҷо намехезам, вой.