ДОСТОНИ МОДАР

Пас аз модар нигоҳи меҳрубоне дидаӣ, оё?
Чу ҳаҷри модар, эй дил, имтиҳоне дидаӣ, оё?

Ҳама афзуд ранги тоза дар ин достон, аммо,
Бад ин сон нотамомӣ достоне дидаӣ, оё?

Ту, эй дил, мурғаки овораи садояшгашта,
Мисоли чашми модар ошёне дидаӣ, оё?

Басе нону намак дидем, аммо ростӣ, эй дил,
Чу қалби модарам густарда хоне дидаӣ, оё?

Бидидӣ бас нишоту ғам, вуҷуди мардуми олам,
Вале чун модар, эй дил, ҷони ҷоне дидаӣ, оё?