ТАНҲОӢ

Соати танҳоӣ,
Ғами ҳиҷрони ту чун пайконе
Мерасад бар ҷигарам, мешиканад.

Бевафо ҳаст ин умр,
Бевафо ҳаст ин ҳусну,
Офтобе, ки биёяд ҳоло,
Чӣ қадар хаставу пир аст чу ман!
Ашк дорам сари мижгон,
Нур андар назарам мешиканад!

Ҳолиё дар чашмам ҷодаву майдон холист
Ва дилам мадрасаи матрукест,
Ки зи ҳангомаи дарсу ғами ирфон холист.

Чӣ ғализ аст ин шаб
Ва чӣ нозук ин субҳ,
Ба дилам дорам бим,
Саҳарам мешиканад.

Бо ҳама зебоӣ
Моҳ бошад танҳо,
Ғами танҳоии ӯ
"Хоб дар чашми тарам мешиканад".