БАҲОР

Ба кӯчаҳои сокити пур аз малол
Ту омадӣ, Баҳор?
Баҳори роздони ман,
Дугонаи азизу меҳрубони ман!

Бубин, Баҳор,
Дигар касе ба шаҳри ман сафар намекунад,
Таронаҳои содаам касе зи бар намекунад
Ва духтаре ба шавку нозу дилбарӣ
Гуле ба фарқи сар намекунад...

Бирав, Баҳор,
Бирав, ки ҷодаҳои шаҳри ман пур аз ғаманд
Ва боғҳои ғарқи гул,
Пур аз шукуфаҳои мотаманд...
Тарона ку?
Фасона ку?
Нигоҳи ошиқона ку?
Ба зери сояҳои зулфи тобдори ман,
Адои пурфусуни дилбарона ку?