А. Сармоягузории хусусӣ — гузориши сармоя аз тарафи шаҳрвандон, инчунин корхонаҳои шакли ғайридавлатии моликият.
Б. Сармоягузории давлатӣ — гузориши сармоя аз ҷониби мақомоти марказӣ ва маҳаллии ҳокимияту идора аз ҳисоби маблағҳои буҷет, фондҳои ғайрибуҷетӣ ва воситаҳои қарзӣ, инчунин аз ҷониби корхонаву муассисаҳои давлатӣ аз ҳисоби маблағҳои худӣ ва қарзӣ.
В. Сармоягузории хориҷӣ — гузориши сармоя аз тарафи шаҳрвандон, шахсони ҳуқуқӣ ва давлатҳои хориҷӣ.
Г. Сармоягузории муштарак — гузориши сармоя аз ҷониби субъектҳои давлатҳои хориҷӣ, ки дар ҳамин кишвар ҷойгир шудаанд.
5. Аз рӯи аломати минтақа:
А. Сармоягузории дохилӣ — гузориши сармоя ба объектҳое, ки дар ҳудуди қаламрави ҳамин кишвар ҷойгиранд.
Б. Сармоягузории беруна — гузориши сармоя ба объектҳое, ки берун аз ҳудуди қаламрави ҳамин кишвар ҷойгир шудаанд.

8.2. Танзими ҳуқуқии фаъолияти сармоягузорӣ

Фароҳамсозии фазои мусоиди сармоягузорӣ дар кишвар ба танзими дақиқи фаъолияти сармоягузорӣ алоқаманд аст.
Фаъолияти сармоягузорӣ маҷмӯи ҳаракатҳои амалии шаҳрвандон, шахсони ҳуқуқӣ ва давлат оид ба амалигардонии сармоягузорӣ мебошад.
Заминаи қонунгузории мақоми сармоягузорон, субъектҳои фаъолияти сармоягузориро муайян мекунад, ки дар хусуси гузориши дороиҳои худӣ, қарзӣ ва ҷалбшуда ба объектҳои сармоягузорӣ тасмим мегиранд.
Қонунгузорӣ чунин муқаррар мекунад, ки ҳама субъектҳои фаъолияти сармоягузорӣ, сарфи назар аз шакли моликият, дар қисми амалисозии ин фаъолият ҳуқуқи баробар дошта, мақсад, самт, намудҳо ва ҳаҷми сармоягузориҳоро мустақилона муайян менамоянд; барои амалигардонии онҳо дар асоси шартномавӣ ҳама гуна ширкаткунандагони фаъолияти сармоягузориро, аз ҷумла ба тариқи ташкили озмуну фурӯшҳо, ҷалб мекунанд. Сармоягузор ҳуқуқи соҳибӣ, истифодабарӣ ва ихтиёрдории объекти натиҷаҳои сармоягузориро дорад.
Дар баробари ҳуқуқи сармоягузорон қонунгузории амалкунанда ба зиммашон уҳдадориҳои муайянеро ҳам вогузор намудааст. Чунончӣ, сармоягузор уҳдадор аст ба мақомоти молия