Ва фардо алами Абумуслимро ба коми оташ меандозад... Ва сипоҳиёни норизои хешро ба ҳабс мегирад...
Ва ба ҷомаи сафед нишаста, бар аспи сафед барафрошта алами сафед, аз кӯҳҳои сафед ҷониби Рай ҳаракат мекунад. Ӯ мерафт, то хиёнат кунад!
Ё Ҳорун, ту бо ҷомаи сафед фақат рӯй сиёҳ кардай! Бо рӯйи сиёҳу ҷомаи сафед куҷо хоҳӣ рафт?!!
Муҳаммади Ҳорун дигар кӯр шуда буд. Он Ҳоруни ҳайёти сарахсиро намедид... Ӯ дигар кар шуда буд ва он Ҳоруни дузди Сарахсӣ кораш дигар фақат паймоншиканиву хиёнат буд.
Дигар ӯ фақат як хоб медид: шабушкҳо бар боли малахҳо чун зулуке часпидаанд.
Ӯ меравад то киштзорҳоро наҷот диҳад...

БАҒДОД

Корвони барандагони Амри Лайс намози шом ба деҳе расид, ки дар саводи Бағдод буд. Ашноси ғулом баъди ба манзиле фуруд овардани ҳамроҳонаш бо дасти сарбозе назди Бадр-ул-Кабир, ки аз сипаҳсолорони Тулӯни ғулом буд ва ботинан бо Амри Лайс душманӣ меварзид, нома фиристод ва омадани амири саркаши саффориро ба ӯ хабар дод. Амри Лайси Саффорӣ замони ҳукуматаш бар як кишвари бузург ва ҳангоми соҳиби шуртаи Бағдод буданаш ба худ иҷоза намедод, ки хулафо ӯро ба Тулӯни ғулом, ки ҳукумати Мисрро бо чоплӯсӣ ва таҳқирҳо ба даст оварда буд, дар як саф гузоранд ва дар Макка аламашро дар ҷои алами ӯ қарор диҳанд. Ин таҳқирҳоро Бадр, ки намояндаи Тулӯн дар Бағдод буд, беш аз соҳибаш эҳсос мекард.
Ҳатто ҷокарони Амри Лайс бо иҳонат ба ӯ, ки сипаҳсолори аббосӣ буд, муносибат мекарданд. Ин кина асосан аз соли 267 (881 м) оғоз шуда буд. Ҳамин сол Муҳаммад бинни Тулӯни сипаҳсолор ва амири Миср ба Макка сафар кард. Ва аз рӯи анъана дар рӯзҳои ид алами Амри Лайсро дар минбар нигоҳ медоштанд. Ба сабаби он ки омили Форс Муҳаммад ибни Лайс хироҷи Бағдодро нафиристода буд, қасд карданд алами Амри Лайсро аз минбари Макка бияфгананд. Ин хабар ба амири Саффорӣ расид, қасди Форс кард ва ба фарзандаш, ки ҳамроҳи Аҳмад ибни Абдуллоҳ ба Хузистон тарҳи хиёнат рехта буданд, ба мазмуни “Ба