Ҳамӯя: Хоразм ҳамеша дар ҳукми умарои Мовароуннаҳр буд ва он аз тарафи омили Амир Исмоил Ироқ бинни Мансур фатҳ шудааст. Беҳтар он аст, ки ин гуфтушунид бо худи амир Исмоил бинни Аҳмад сурат бигирад.

Хоразмшоҳ: Дар ин маврид Хоразмшоҳ масъулияти чунин рисолатро надорад. Алӣ бинни Шарвин намояндагии амири Хуросонро бар ӯҳда дорад.

Алӣ бинни Шарвин ба Хоразмшоҳ ба итоб менигарад.

Шарвин: Ман бо амир Исмоил бинни Аҳмад гуфтушунид мекунам.

Ҳамӯя бо Алӣ бинни Шарвин ва чанд нафар сипоҳӣ бар аспҳо нишаста, сӯйи лашкаргоҳи амир Исмоил мераванд. Дар лашкаргоҳ аз Алӣ бинни Шарвин хуш пазироӣ мешавад.

Амир Исмоил: Ман Хоразмшоҳро интизор будам, ки бубинам, вале чӣ фарқ мекунад?!

Шарвин: Ӯ масъулияти гуфтушунидро бар дӯши ман, ки аз амири Хуросон намояндагӣ мекунам, вогузошт.

Амир Исмоил: Ба амир Амри Лайси Саффорӣ ва Хоразмшоҳ Муҳаммад бинни Амр бирасонед, ки мо толиби ҷанг нестем, вале агар зарур шавад, қудрати онро дорем, ки аз сарҳадоти худ ҳимоят ба амал оварем ва якпорчагии мамлакати хешро ҳифз намоем... Вале нигарон аз онем, ки байни мо шикофе ба вуҷуд ояд ва ин ба нафъи ҳеҷ тараф нест, зеро мо аз ду тараф дар маҳрази ҳамалоти душманони кишвари хеш қарор гирифтаем. Мо аз шимол ва амир Амри Лайси Саффорӣ аз ҷануб. Бинобарин хуб нест, ки байни мо низоъ сар занад. Баргарбед ва ба Амри Лайси Саффорӣ бирасонед, ки ӯро кишварҳои Ироқайнҷу Хуросон ва Забулистону Кобулистон кифоят мекунад. Бар мо Варорудро вогузорад ва аз ҷониби шимолии сарҳадот эмин бошад. Бар мост, ки кишвари Варазруд ва Хуросонро аз таҳоҷуми қавмҳои ваҳшии шимол ҳимоя намоем. Ба ин хотир низоъ байни мо бемаънист. Ман пешниҳод мекунам: ҳанӯз, ки байни мо халое ба вуҷуд наёмадааст, ба назди Амри Лайси Саффорӣ баргарбед. Хоразм наметавонад боиси низои мо бишавад, зеро он ҳамеша як ҷузве аз кишвари Варазруд будааст ва хоҳад буд. Мо бо ҳеҷ як аз кишварҳои исломӣ сари душманӣ надорем.

Шарвин: Ман ин паёми амири Варазрудро ба амири Хуросон Амри Лайси Саффорӣ хоҳам расонд.