Сабо беҷо, вале бо давлату ҷоҳи ту мегардад,
Аз он ҳамроҳи доғам, соя ҳамроҳи ту мегардад,
Маҳи афлок ҳар шаб аз рухи моҳи ту мегардад,
Ба таб афканда хуршеди рухат хуршеди тобонро.
Бичинад шохи насрин хӯша аз гесӯи пурчинат,
Шафақ беранг гардад аз ҳинои дасти рангинат,
Зи Ширин бигзарад Фарҳод, бинад лаъли ширинат,
Шавад мушки Хито ночиз пеши зулфи мушкинат,
Кунад хомӯш шамъи оразат шамъи шабистонро.

Бувад пеши забонат Туғрали ширинзабон алкан1, Шикан хубони оламро кулоҳи дилбарӣ бишкан, Ба ман омад ба мизони муҳаббат аз ғамат бо ман, На танҳо Гулшанӣ аз ҳаҷрат, эй гул, доғ дар гулшан, Ба ранги лола аз ишқи ту дидам лоларӯёнро!

МУХАММАС

Ҳалқаи зуннор шуд то зулфи анбарсои ту,
Хуни мардум рехт яксар наргиси шаҳлои ту,
Сарву тӯбо шуд хиҷил аз он қади болои ту,
Эй ки Юсуфро ба бозор оварад савдои ту,
Муъҷизи Исо намояд лаъли ҷонафзои ту!

Баски будам дар ғамат ошуфта ҳамчун ёсуман,
Аз фироқат шуълабардӯшам чу шамъи анҷуман,
Ғунчаи лаъли лабатро ошноӣ дар сухан
Нест, эй бадхӯ, тағофул чанд бошад роҳзан?!
Лутф набвад, гар ғазаб созӣ, навозишҳои ту!

1 Алкан – сактазабон; забони лакнатдор.