Модар чунон хурсанд шуд, чунон хурсанд шуд, ки!..
Дегҷаро рӯйи дастонаш гирифта дӯстдорӣ кард:
Дегҷаи сиёҳи оча,
Духтари чу моҳи оча.
Ғилдир-ғилдир меравад,
Пеши додо мерасад.

• Бибиҷон, Дегҷаи сиёҳ ба моҳ монанд мешавад?
• Кӣ дӯғи худаша турш гуфтааст? Гамбуск ҳам бачаша сафедакам, лолопоям гуфта дӯстдорӣ мекунад. Гапа набуру гӯш дор.
  Хуллас, модар ошу нонро даруни Дегҷа андохта, сари кор гуселонид. Дегҷа гелида-гелида пеши падараш омад.
• Додоҷон, ман хӯрокатона овардам, - гуфт ӯ.
  Падар чунон шодӣ кард, чунон шодӣ кард, ки мондан гиред. Медонед, чӣ гуфт?
• «Дегҷаи хушрӯйи додош» гуфт, — мегӯям ман.
• «Духтари дилҷӯйи додош» гуфт, — илова мекунад хоҳарам.
• Боракаллоҳ! — мегӯяд бибиам, Воқеан, падари Дегҷаро Кали Ёр мегуфтанд. Кали Ёр боз мегӯяд:
  Саракаш сиёҳи додош,
  Рӯякаш чу моҳи додош.
• Бибиҷон, охир, дафъаи гузашта падари Дегҷаро дигар хел ном гирифта будед-ку?
• Дуруст, вай Пири Кӯса буд. Чунки вай дигар одам буд. Духтари вай Дегҷаи дигар буд. Ин Дегҷа - дигар Дегҷа. Пири Кӯса Дегҷаи худашро ин тавр дӯстдорӣ мекард:
  Дамбураки додош омад,
  Пурхӯраки додош омад...
• Охир, ин суруди Пири Кӯса не. Ин дӯстдориҳои бобои Мулло Чалолам-ку...
  Дар ҳақиқат падарбузургам мо - набераҳоро сари зону гирифта дӯстдориҳо мекарданд, бозӣ медоштанд. Масалан, он кас гоҳо маро, ки ҳанӯз кӯчак будам, мефармуданд:
• Ча-чая тиед.