• Ман аз ту пурсиданиам, ки чӣ гап? Ҳеҳ, дар гӯри ту барин аҳмақ...

Янгаам аз паси тиреза гузашт. Ман зуд либос пӯшидам.

• Монед, акоҷонаш. Шарифҷон хатояшро фаҳмид, дигар номаъқулиашро такрор намекунад. Ҳамту не, Шарифҷон? - ӯ ба маънои «ҳамин хел гӯй» ба ман чашмакӣ зад.

• Ту ҷим шин, мӯйдарози кӯтаҳақл! Моро танҳо мон, агар не...

Янгаам ғайб зад. Аз пасаш бо кароҳат менигаристам. Зан аз тухми шайтон мерӯяд, мегуфтанд, ки рост будааст. Гоҳ оташ дармедиҳаду гоҳ об соф мекунад.

• Забонат ба қомат часпид? Вақти бо ҷӯгии бӯгин мулоқот карданат булбули гӯё будӣ-ку! Ту, аз афти кор, маро сарҳам кардаӣ! Не, ман ба ин шармандагӣ тоб намеорам! Дастонатро мешиканам, то ҳаргиз ҳалқаи гардани ҷӯгиҳои кӯча нашавад! Фаҳмидӣ, ҳаром?! Аз ин музофот номатро гум мекунам!

• Хайр, бас! - ман чӣ гуфтанамро надониста, аз бозувонам дастони бародарамро дур кардам.

• Бас будааст-а! Ҳозир аз ду якеро интихоб мекунӣ: ё хешу табор, ё он зоғчаи бадбӯй!

Бо гуфти бародарам, забонам ба комам часпида буд. Ман чӣ гӯям ба ӯ? Гӯям, ки бо духтарак муносибати ҷиддие надорам, бовар намекунад. Чӣ сон дилашро ором кунам?

• Гап зан, ҳаром, кадомаш?

«Ҳаром» мегӯяд? Вай аз ман чӣ мехоҳад? Агар домани маъшуқаамро сар надиҳам, аз деҳа дур шавам? Аз баҳри ӯру диёр бароям? Чӣ хел забонаш мегардад? Магар намефаҳмад, ки ману зодгоҳам решапайвандем? Ва зиёда аз ин, ӯ чӣ ҳақ дорад, ки ба дили ман фармон диҳад? Ҳолоку ҳеҷ гап нашудааст, агар дар ҳақиқат ман Истамро дӯст дорам-чӣ? Магар намеарзад? Вай аз зани акоям ва духтарони деҳ чӣ ками дорад?