АБДУРОФЪ РАБИЗОДА (Рабиев) - муаллифи 41 китоби ба табъ расида, аз он ҷумла 32 китоб бо тоҷикӣ ва 9 китоб бо забони русӣ. Асарҳояш ҳамчунин бо 40 забони хориҷӣ тарҷумаву нашр шудаанд, аз он ҷумла бо забонҳои англисӣ, испонӣ, арабӣ, ҷопонӣ, фаронсавӣ, булғорӣ, олмонӣ, чинӣ, ҳинду, украинӣ, қазоқӣ, чехӣ, лаҳистонӣ, узбекӣ ва ғайра.

Вай муаллифи зиёда аз сӣ филми ҳунарӣ ва санадӣ бошад, аз ҷумла филми машҳури «Марди мутааллиқи ду зан».

Эҷодиёти Рабизода панҷ ҷоизаи ҷаҳониро сазовор гардидааст, аз он ҷумла ду Гран При ва як Ҷоми Лоҷвард.

Навиштаҳои Абдурофъ Рабизода дар маҷаллаҳои зиёди Россия ба табъ расидаанд ва ҳамчунин ба китобҳои дарсии мактабҳои олии Россия («Этика ва эстетикаи ҳаёти оилавӣ») ва Британияи Кабир («Садоқату муҳаббати инсонӣ») ворид гардидаанд.

Президенти Тоҷикистон хизматҳои Абдурофъ Рабизодаро барои шӯҳрат бахшидани адабиёти тоҷик дар арсаи байналхалқӣ бо орденҳои «Шараф» қадр кардааст.

Дар ҳамкории Отахони Латифӣ ва Абдурофъ Рабизода, ғайри ин қисса инчунин китоби «Рӯзгори соҳибдилон» (иборат аз се қисса) иншо шудаанд.

Инчунин филмномаи «Хоки пайвандӣ» (доири овозхони шашмақоми тоҷик Ҳоҷӣ Абдулазизи Самарқандӣ) аз нигоштаҳои ин ду нафар ба ҳисоб меравад.