Нигоҳи хастаи ман нӯги дарахтҳоро гузашта, бар дӯши теппаҳои тару сабзахез медавиду аз ин мӯъҷизаи шигифтангези табиат ҳайратам меафзуд: дар гӯшаи осмон Камони Рустам дамида, хаёле ба теғаи пурбарф мехалид. Тарҳаш хираю ғуборандуда, ҷилои рангҳояш каме коста, таровиши нафосаташ ҳанӯз норасо, вале ба чашму дил фораму азиз. (109 калима)

Бароти Абдураҳмон

26
Яке аз ҷумлаҳои содаро таҳлил кунед.

БИБИРУХСОРА

Инак, ғайр аз шилдироси оби ҷӯйбор дигар садое шунида намешавад. Ҳаво салқин аст. Ҳамон бодаки серун ба пардаи дари хона сабук печида, аз роғи таки он дам ба дам сар мехалонад ва ман хоса ҳаловат мебарам аз ин. Ҳоло дигар намебарояд овози Бибирухсора. Вай ба чӣ машғул бошад? Аз Суҳайло низ садое немерасад. Саҳни ҳавлӣ об задагӣ барин дар ҳалқаи сукут қарор дорад. Лаҳзае пас онро аз дуриҳо ғур-ғури кадом трактор халал оварда, баъде фурсате якбора хомӯш мегардад. Боз сукунат. Ба мисли дирӯз ё парерӯз овози кӯдакони Хуросон ҳам намеояд, Бибирухсора онҳоро гирифта, чоштгоҳ ба дидори падараш рафта буд. То бегоҳ бояд баргарданд. (109 калима)

Саттор Турсун