---

Се чизро пешаи худ бояд кард: дил ба даст овардан, бо ҳама кас некўӣ кардан, дар ободонӣ кўшидан.

---

Се чиз далели аблаҳист: хештанбинию такаббур, бахилӣ кардан, аз сифла умед доштан.

---

Чаҳор чиз далели саодат аст: қавли дуруст, тавозуъ дар ҳама ҳол, саъй дар касби ҳалол, нигаҳ доштани роз.

---

Кадом сухан аст, ки рост бошад ва дурўғ нанамояд?!
Баёни зўри ҷавонӣ дар пирӣ ва айши тавонгарӣ ба фақирӣ.

---

Касе, ки мадҳи ту кунад ба чизе, ки дар ту набошад, аз ў эҳтироз кун, ки низ замми ту кунад ба чизе, ки дар ту набошад.

---

Ҳаргиз бо пул наметавон сарбози хуб, муаллими хуб, ҳунарманди хуб ё коргари хуб сохт.

---

Аз ҳакиме пурсиданд:
– Кадом як аз ғизоҳо барои шумо лазизтар аст?
Гуфт:
– Таоме, ки бо ранҷу заҳмати худ ҳосил карда бошам.

---

Бадтарин одам касест, ки мардумро душман гирад ва мардум ўро душман доранд ва озори мардум диҳаду дарнагузарад ва узр напазирад.

---

Кафандузд аз сухандузд имтиёзи фоҳише дорад, ки он пероҳани тан мебарад, ин риштаи ҷон.

---

Дар шаҳрҳо овозаи бадномии ту рафт, акнун дусад фаришта накў гўядат, чӣ суд?

---

Чаҳор чиз чаҳор касро набошад: дурўғгўро мурувват, бахилро саодат, ҳасудро ростӣ, бадхўйро меҳтарӣ.