Ҳаминаш ҳам ҷолиби таваҷҷӯҳ аст, ки дар байни адибони рус бисёр занонеро номбар кардан мумкин аст, ки дар рушди адабиёти шӯравии рус ҳиссаи хоксоронаи худро гузошта, сазовори эҳтироми миллионҳо хонандагон гардидаанд. Вақте ки дар бораи адиба ва шоираҳои рус сухан меравад, кас мехоҳад пеш аз ҳама хизмати Ольга Форшро дар рушди адабиёти шӯравии рус қайд намояд. Ольга Форш аз соли 1908 сар карда, ба фаъолияти адабӣ шурӯъ менамояд. Романи таърихии инқилобии «Сангпӯш», роман дар бораи тақдири фоҷиавии бандии қалъаи Петропавловск Бейдеман, асари сегона дар бораи Радищев ва асари дигари ӯ дар бораи се насли меъморҳои рус В. И. Баженов, К. И. Росси, А. Н. Воронихин «Касри Михайловск» ба тараққиёти романи таърихии шӯравӣ мусоидат кард. Соли 1937 аз рӯи сенарияи ӯ филми «Пугачев» наворбардорӣ шуда буд, ки ба он тамошобинони шӯравӣ баҳои баланд доданд. Хонандагони шӯравӣ романи дар соли 1953 нашркардаи Ольга Форш «Фарзандони нахустини озодӣ»-ро ҳам, ки дар он муборизаи декабристҳо акс ёфтааст, ба хубӣ қабул карданд. Хонандагони сершумори шӯравӣ бо асарҳои шоира ва адибаҳои рус Вера Панова, Татяна Тэсс, Галина Николаева, Людмила Уварова, Елена Успенская ва дигарон низ кайҳо боз шиносанд.

Хушбахтии халқҳои ИҶСШ навишта буд, нависандаи машҳури қазоқ М. Авазов, забони русӣ ҳамчун забони адабиёти бузург, ки ба муқобили синфҳои истисморкунандаи ҳукмрон меистод, аз қадим бо муҳаббати бародарона онҳоро ба худ ҷалб мекунад. Дар замони шӯравӣ забони русӣ якдилона сарвати умумихалқӣ дониста шудааст, ин забон, ки дар мактабҳои ҳамаи ҷумҳуриҳои мо омӯхта мешавад, ба халқҳои онҳо дар рушд додани фарҳанги бисёрмаллатаи сотсиалистӣ хизмат мерасонад. Мо забони русиро дуввумин забони модарии худ меномем.