ситорагармеро дид, ки ҳалимакак буд ва лабонаш ба кас табассум мекарданд.

• Марҳамат, ба хона даро, - гуфт Маруся бо камоли эҳтиром. - Партизанҳо аз хусуси ту гап зада буданд.

• Шояд, - гуфта монд Андрейка.

• Номат чӣ?

• Номам Андрейка, вале дар рухсатнома Володя навишта шудааст, - гуфт Андрейка.

• Падару модар дорӣ?

• Аҳли оиламонро фашистон парронданд.

• Ба Чернухино назди кӣ меравӣ?

• Назди холаам.

• Холаат чӣ ном дорад?

• Анастасия Андреевна.

• Ӯ чӣ кор мекунад?

• Намедонам.

• Хонаашро медонӣ?

• Не, намедонам, - ман бори аввал ба он ҷо меравам.

• Барои ба Чернухино рафтан рухсатнома дорӣ?

• Дорам.

• Канӣ, нишон деҳ.

Андрейка аз киссаи чапаш коғази чоркунҷаеро бароварда ба Маруся дароз кард. Маруся коғазро гирифта кушод. Дар он чунин навишта шуда буд:

«Рухсатнома

Дода шуд ба Владимир Бородин дар ин хусус, ки ба ӯ рухсат дода мешавад ба истгоҳи роҳи оҳани Чернухино ба назди холааш Анастасия Андреевна равад. Муҳлати рухсатнома ду моҳ.

Коменданти шаҳри Лисичанск
обер-лейтенант П. М.».