аз ин хукҳояшонро сар зада будем. Дар хотир доред, гуфта будед: «Ин хук не, буққачаи бонӣ кардашуда будааст!».

• Ҳа-а,- гуфта монд немис. Политсай сарашро сӯи писарбача яктарафа хам карда, кунҷковона пурсид:

• Дар он ҷое, ки замбӯруғҳо ҷамъ кардӣ, бо... - политсай мехост «бо партизанҳо» гӯяд, вале бо андаке ин тавр гуфт, - бо одамони яроқдор вонахӯрдӣ?

• Бо одамони яроқдор? - пурсид писарбача ва андешамандона сарашро хам кард. Чашмони политсай дурахшиданд.

• Бале, бале, бо одамони яроқдор...

Ҳирко ба политсай як нигоҳ карда, ба фикр фурӯ рафт, гӯё аз худаш мепурсид: «Гӯям-чӣ мешавад, нагӯям-чӣ мешавад?»

Политсай ба ҷӯшу хурӯш омада, гуфт:

• Гап зан, натарс.

Ниҳоят Ҳирко оҳиста гуфт:

• Се-чор нафарашонро дидам, лекин...

• Чӣ лекин? - пурсид политсай ба ҳаяҷон омада.

• Лекин милтиқҳояшон аз они шумо барин не, кимчӣ хел...

• Милтиқҳои шикорӣ барин?

• Ҳа, ҳа, милтиқҳои шикорӣ барин...

• Баъд чӣ?

• Онҳо маро назди худ даъват карда, аҳволи оилаамонро пурсиданд. Яке аз онҳо ба ман қанду нон дод...

• Хуб, хуб, - гуфт политсай, - аз гуфтаҳои Ҳирко қонеъ гардида. - Лекин нашунидӣ, ки байни худ чӣҳо мегуфтанд? Канӣ, ба хотир биёр!

Ҳирко чанд дақиқа фикр карда, ниҳоят гуфт:

• Фақат ҳаминашро шунидам, ки одамие маро зиёфат карда ба рафиқонаш гуфт: «Даста кай бармегашта бошад? Агар медонистем, хӯрок пухта мемондем...»