Пушаймонӣ
Пироҳане нест, ки рўҳи урёни туро бипўшонад.

---

Калиди андешаи гул
Қуфли зангзадаи ғами дилатро кушод,
Атри орзуи ман меҳмони нохонда шуд...

---

Офтоб ба замин гуфт:
«Хулосаҳо гирданд!»
Бодирингро вараҷа гирифт,
Гандум лаб газид,
Харбуза, ки аз шўхии шарбат завқаш расида буд,
Паққос хандид...

---

Ҳама чиз замон-замон бўйи пўсидан медиҳад:
Бод низ,
Борон низ,
Сухан низ...
Ҳамин нур аст, ки бўйи пўсидан намедиҳад...

---

Меваи расидае гуфт:
– «Хулоса ширин аст!»
Ва аз шоха афтод Анчар барге ба рўяш афканд.

---

Хулосаҳои динҳо ба зиндагӣ хўрда
Пора-пора шуданд;
Бечораҳо,
Аз баландии андешаи нав афтодаанд...

---

Гуфтанд:
– Ҳақиқат як рў дорад!
Гуфтам:
– Дурўғ низ ҳақиқат аст,
Вале чанд рў дорад?...

---

Ту чун зулмат ватангоҳе надорӣ,
Маро бошад Ватан чун рўшноӣ.

---

Туро ҳам бо ту танҳо метавон дид,
Чуноне нурро бинанд бо нур...

---

Ҷавонии ту аз ҳусни ту маст аст,
Чӣ масте, ҷоми лабрезаш ба даст аст.

---

Домани кўҳи диёрам, ки ба рўям ҳама умр,
Санг мебораду дар сина ғами гул дорам.

---

Аз сари шохи баланди хомаҳои ошиқӣ,
Мекушояд бол мурғи номаҳои ошиқӣ.

---

Ҷўши як фаввора фарёдам аз ин ҷастан чӣ ёфт,
Бўсае чашми тамошо диду дар поям шикаст.

---

Суханвар чу дидам ба кори баланд,
Суханро кашидам ба дори баланд.

---