Ин ҳама ғавғойи Замину Замон,
Нест ба ҷуз ғиж-ғижи як чархи чарх.

---

Ногоҳ Замин таркаду резад чу нафас,
Бар гўши фалак нест ба ҷуз ғинги магас.

---

Чу хуршедхўӣ биёмўзамат,
Бубояд чу хуршед ҳам сўзамат.

---

Маҳбаси сад тарс ба дил зодаам,
Рўшании умр зи каф додаам.

---

Ношиноси хубии зан зан занад,
Хештанро бадтар аз душман занад.

---

Ҳазорон сол шуд, ки аз дари хун,
Худамро мекашам аз хеш берун.

---

Ҳар шаб маро маҳ мехўрад, хуршед мезояд саҳар,
Ноҳақ замини ширдеҳ манхори худ пиндоштам.

---

То чун даҳони гардун шуд бесухан даҳонам,
Мисли ситора мардум аз ман гурез доранд.

---

Ман ба се бурҷи накўӣ тохтам,
Дар бади шаш бурҷ худро бохтам.

---

Ин худотарсони дўзахрўйи халқ,
Аз таассуб зода дўзах сўйи халқ.

---

То чу афғон мондайӣ зиндони ҳис,
Кай Худоро дидайӣ дар ҷони ҳис.

---

Баски чун нур дарахте шудаам сар ба фалак,
Дўстони хасакӣ рехта чун тути хасак.

---

Ҳеҷ кас чун мо нашуд ғозии дин,
Дигарон динбозу мо бозии дин.

---

Дар биёбони сари хеш гумам,
Лаби дарёи дили худ ғарқа.

---

Камоли маърифат дунёпазир аст,
Ки ҳам поёну ҳам болопазир аст.

---

Кунанд одоби қаҳба суннати ом,
Вале одоби навҷўӣ таҳи гом.

---

Фарзанди бузурги офтобам,
Ин ҷой думомаде битобам.

---

Кай шиносӣ нав набинӣ кўҳнагии хешро
Кай чу гул аз чашм чинӣ кўҳнагии хешро.

---