Чун Замини кўдакистон пур шуд аз тифлони пир,
Кўдаки ояндаро гў: – Навбати оянда гир.

---

Аз мағалҳои гарони кўдакони мўсафед,
Кўдаки гаҳвораи оянда меларзад чу бед.

---

Тарси ту дўзахкушое зери по
Шаҳватат фирдавсзое дар само.

---

Гар даҳон гардад саросар осмон,
Кай биғунҷад ростӣ дар он даҳон.

---

Мурдаҳои зиндахўр афзуду афзун зиндаҳои мурдахўр,
Ин заминро метавон гуфтан сарои мурдахўр.

---

Зиндазори дил агар бо чашми мурда бингарам,
Аз биҳишти зиндаи худ сўйи дўзах мепарам.

---

Ба зиндони паямбарҳо чунон хобидаанд афзун,
Ки модарзода кўр оянд олимҳояшон берун.

---

Мурдадилҳо зиндагиро баски дўзах дидаанд,
Мурдаи худро чу дўзах сар-сари раҳ чидаанд.

---

Тафаккур чун ба зиндони маҳал мурд,
Бигў: – Дар мабраз ин кирми касал мурд.

---

Дил бар маҳали хеш фишонад рўбоҳ,
Мурғ аз маҳали дигар кашонад рўбоҳ.

---

Ҳар ду олам шуд ба яктан ростӣ,
Аз даруни ростӣ бархостӣ.

---

Ҷаҳон дар ман асту ман андар ҷаҳон,
Ҷаҳон дам ба дам нав, чаро ман куҳан?

---

Гули зиндагонӣ бибўву бирав
Гуле то бибўяд гуле шав зи нав.

---

Чашми нози нигаҳи имрўзӣ,
Чанд бо хоки куҳан месўзӣ.

---

Таассуб чун бубинад чеҳраи нав,
Ки буда кўри модарзоди якрав?

---

Аз нафарҳои бузург омад сафарҳои бузург,
Зинахун кай мебарад то зинафарҳои бузург.

---

Бо гул урёни дарунобод зӣ,
Чун Замину Осмон озод зӣ.

---

Ба сайёразоӣ фалак чид гард,
Пайи зодани ман Замин чид дард.

---