Нигоро, бе ту зору дардмандам,
Ба занҷири фироқат пойбандам.
Бухорову Самарқандӣ, аё гул,
Ки то имрӯз дил аз ту накандам?

Баҳор ою баҳор ою баҳор ой,
Чу фасли навҷавонӣ ғамбарор ой.
Диламро боғзор аз ишқ карда,
Мисоли оби чашма беғубор ой.

Баҳори гулбасар дорад дили ман,
Ниҳоли босамар дорад дили ман.
Барои пухтани ҳар сатри хомам
Танӯри пуршарар дорад дили ман.

Дар ин дунёи бемеҳри шитобо
Бигирам ман зи домони ҳавасҳо.
Ба чашми ашкбори хеш ҷӯям
Туро чун хандаи Устову Масто.

Ҷавонию ҷавонию ҷавонӣ,
Сафобахши замину осмонӣ.
Сурудатро танинадоз карда,
Бисоземат ҳамеша посбонӣ.

Нигори хушдиламро дӯст дорам,
Нигори хушгиламро дӯст дорам,
Ба дил азбаски меҳраш ҷо гирифтаст,
Аз ин рӯ ман диламро дӯст дорам.

Бимонад сурхрӯ нону танӯраш,
Ватан подор бо мардони зӯраш.
Илоҳо дур бошад аз балоҳо
Ҷаҳону офтоби пур зи нураш.