Ватан, дардат ба ҷонам ошно шуд,
Дилам бо дарду доғат ҳамсадо шуд.
Ба дард омад даме ки талхаи ман,
Ба дардам талхаҳои ту даво шуд.

Наҷӯӣ раҳ, наёбӣ раҳбареро,
Наёбӣ дил, наёбӣ дилбареро.
Чароғи ёди ту хомӯш гардад,
Надорӣ гар ба сина озареро.

Нигорам, гесувонат реза-реза,
Макун ҳар соате бо ман ситеза.
Чунон бо соҳирӣ бурдӣ диламро,
Зи дар ронӣ, дароям аз тиреза.

Ватан бошад агар чун сӯзание,
Барои ӯ шавам монанди сӯзан.
Ҳуруфи дӯстиву ростиро
Ба домонаш кунам гулдӯзие ман.

Нигори нозанини шӯху шангам,
Макун ҳар лаҳзае беҳуда ҷангам.
Бихоҳам симу зар резам ба поят,
Чи чора, дасти кӯтаҳ зери сангам.

Ба дунё гарчи беномем тавлид,
Тамоми ҳастиеро ном бидҳем.
Ба шири хом гарчанде бирастем,
Ба пухта хомро анҷом бидҳем.

Набошад қасрро бе поя будан,
Чаманро бе гиёҳу лола будан.
Ба якдигар ҳабибу ёрмандем,
Ки зӯрирост дар якҷоя будан.