Санъати тасвирии тоҷик таърихи қадимӣ дошта, намунаҳои аввалини он ба ҳазораҳои 15–10 то милод тааллуқ доранд. Намунаҳои нисбатан содаи он дар осори мадании давраи неолити Ҳисор (ҳазораҳои 6–5 то милод) мушоҳида мегардад. Санъати рассомӣ дар давраи Бохтариҳо ва Кушониён дар заминаи санъати меъморӣ бештар дар шакли деворнигораҳо инкишоф ёфт. Сужетҳои тасвирҳои рӯйидеворӣ бештар аз лаҳзаҳои базм, разм, маросими қабул, шикор, тасвири лавҳаҳои асотирию қаҳрамонӣ, симоҳои худоён иборатand.

Натюрморт навъи санъати тасвирӣ буда, дар он гул, мева, сабзавот паранда, ашёи рӯзгор, дасторхони пурнеъмат, олоти ҷудогонаи меҳнату маишат ва ғайра тасвир карда мешавад. Ғайр аз чизҳои беҷон дар натюрморт ашёи табиати зиндаро аз мавқеи табииашон ҷудо намуда, ҳамчун ҷузъи алоҳида тасвир мекунанд (масалан, моҳӣ, гулдаста ва ғайра). Натюрморт ҳамчун навъи мустақил асри XVII дар Аврупо ташаккул ёфта, дар асрҳои XVIII–XIX ба зинаи баланди инкишоф расид.

Графика навъи санъати тасвирӣ буда, сиёҳқаламӣ ва асарҳои нафисаи чопӣ (ҳаккокӣ, литография ва ғайра)-ро дар бар мегирад. Асоси графика усули песа (моҳирона ба кор бурдани тобишҳои ранги сиёҳу сафед) аст. Дар санъати графика, баръакси дигар навъҳои санъати тасвирӣ, рангҳои равғаниро истифода намебаранд. Графика дар байни эронитаборон таърихи қадимӣ дошта, то истилои араб хеле нашъунамо ёфта буд ва намунаҳои он дар Авесто ва «Аржанг» дарҷ ёфтаанд.