ЮНОНИ ҚАДИМ

Нахустин давлатҳои Юнони Қадим дар нимҷазираи Балкан Крит ва Микена буданд, ки дар асрҳои XVI-XV то милод ташаккул ёфтаанд. Мардуми ин давлатҳо асосан кишоварзу чорводор буда, ҳунарҳои косибӣ, киштисозӣ, кулолгарию силоҳсозӣ ва заргарӣ низ доштанд. Косибону ҳунармандони чирадасти Криту Микена маҳсулоти косибӣ, махсусан зарфҳои хушсохти кулодӣ ва зеваролотҳои биринҷиву мисини худро ба кишварҳои Осиёи Хурд ва ҳатто Сурияву Миср ҳам мефурӯхтанд.

Мактаб дар
Юнони Қадим.

ЧАРО ТАМАДДУНИ ЭЛЛИНИ МЕГӮЯНД?

Тамаддуни Юнони Қадим дар нимҷазираи Эллада, дар соҳилҳои баҳри Миёназамин пайдо шуда, аз ин рӯ дертар бо номи тамаддуни эллинӣ шуҳрат ёфтааст.
Тамаддуни эллинӣ дар шаҳр-давлатҳои нахустини Юнонзамин – Афина, Спарта, Фив, Коринф падид омада, дар осори меъморӣ, ҳайкалтарошӣ ва офаридани тимсоли худоёни Юнони Қадим шакл гирифт ва дертар дар бунёди Олимп ва Акропол чун падидаи беназири санъат шуҳрат ёфт. Файласуфони юнонӣ Сукрот, Афлотун ва Арасту, олимони барҷастаи соҳаи риёзиёт Фисоғурис (Пифагор), Евклид ва Архимед дар кулли ҷаҳон машҳуранд.