Динозаврҳо ҷонварони хушкигарди хеле калон буда, як замоне дар рӯи Замин зиндагӣ мекарданд. Динозаврҳои калонтарин, ки ғизояшон рустанӣ буд, зауроподҳо ном доштанд. Зауроподҳои бузургҷусса зоҳиран аз якдигар фарқ мекарданд. Қади баъзе зауроподҳо баробари бинои чаҳорошёна буд.

Устухони аз ҳама калон устухони зауроподҳо буд, ки ҳатто як устухони тани онҳо тақрибан 450 кг вазн дошт. Бо чунин устухонҳои бузург ҳаракат кардан хеле душвор буд. Баъзе устухонҳои коси динозаврҳо аз қади одам низ баландтар буданд.

Кафи пойи пеши зауроподҳо ва брахиозаврҳо хеле бузург буда, он тақрибан як метр дарозӣ дошт. Изи пойи ёфтшудаи баъзе динозаврҳо чунон бузургу амиқанд, ки дарунашон даромада нишастан мумкин аст. Кафи бузурги онҳо шояд барои бардоштани вазни гарон хизмат мекард. Палеонтологҳо (дериншиносон) аз рӯи пайи пой андоза, вазн ва суръати ҳаракати динозаврҳоро муайян месозанд.

Аз рӯи устухоне, ки мутахассисон пайдо кардаанд, маълум гашт, ки суперзавр ва ултразавр нисбат ба брахиозавр калон ва вазнинтарин будаанд. Ултразавр 30 м дарозӣ, 12 м баландӣ ва 130 т вазн дошт.

Динозаври калонтарини даранда тираннозавр-рекс буд, ки то 15 м дарозӣ ва зиёда аз 5 м баландӣ дошт. Фақат дарозии сари он беш аз як метрро ташкил медод. Тираннозавр даҳонашро боз карда, метавонист ҳайвоноти баробари одамро ба осонӣ фурӯ барад.