Аввали тоҷикии ин китоб (нашриёти «Ирфон» соли 1983) дар тарҷумаи нависанда Бахтиёри Муртазо истифодаи фаровон кардаам. Хусусан, аз қисмати портрети Бунин, ки дар хусуси вижагиҳои забони осори бадеъ ва оҳангу мусиқии забон андешаҳои бикру дақиқ баён шудааст.

Нашрияи миллии адабии «Садои Шарқ» бо ифтитоҳи гӯшаи «Мактаби адабӣ» тасмим гирифт, ки дар шумори осори дигари муносиб ин китобро ба хонандагон арза кунад. Ба ин хотир аз се сол қабл матни электронии ин китоб аз мутарҷими тоҷикии он нависандаи маъруф Бахтиёри Муртазо дархост шуд ва ниҳоят дар ибтидои соли ҷорӣ он ба идораи маҷалла пешниҳод гардид. Маълум шуд, ки дар тӯли ин муддат нависандаи пуркору масъулиятшинос матни пешини тарҷумаи худро дубора аз таҳрир бароварда, як боби аз нашри пешин фурӯгузоршударо тарҷума карда, онро комил кардааст. «Садои Шарқ» аз шумораи чаҳорум ба нашри ин китоби хонданӣ шурӯъ намуд ва ибтидо қарор бар ин буд, ки ба таври мунтахаб дар ду-се шумора нашри он анҷом ёбад, аммо истиқболи густурдаи хонандагон водор намуд, ки ин нашр то интиҳои китоб идома ёбад.

Мутарҷими китоб муҳтарам Бахтиёри Муртазо ҳамон гуна, ки муаллифи «Садбарги зарин» ба забони асари бадеъ муносибати фавқулода бодиққат ва ҳунармандона дорад, ин китобро ба забони сара ва шевою ғанӣ тарҷума кардааст ва маълум аст, ки тарҷума бо илҳоми саршор анҷом гардида, мутарҷим бо ҷаҳони маънавии соҳиби матни асл на танҳо ошноии хуб дорад, балки онро барои худ қарин медонад, ба арзишҳое, ки Константин Паустовский онҳоро васф мекунад, арҷу эҳтиром қоил аст.

Алғараз, чопи китоби «Садбарги зарин» дар сурати такмилшудаи он, бешак, падидаи масарратбахши адабӣ ва фарҳангӣ буда, дастовези пурарзишест барои дӯстдорони адабиёт, соҳибони завқ ва бахусус адибони ҷавон, ки метавонанд ҳар яке дар хилвати унс ин мактаби олии адабиро тай кунанд.