ОВОЗИ НАЙ

Ҳамдам — тағои найнавоз
Найро ба каф бигирифт боз,
Деҳро гирифт овози най,
Овози афсунсози най.
Саҳро пур аз овоз шуд,
Гунҷишк дар парвоз шуд.
Сармо гурехт аз деҳи мо,
Омад баҳори дилрабо.
Гуфтам: — Тағои найнавоз,
Хоҳам ба ту умри дароз,
Моро баҳор овардай,
Савти ҳазор овардай!

ОЧАИ ХУШРӮИ МАН

Оҷаи хушрӯи ман,
Оҷаи хушмӯи ман.

Дасту рӯят мешӯям,
Баъд аллаат мегӯям.

Аммо ту доимо хап,
Намегӯӣ ягон гап.

Боре нагӯӣ «оҷа»,
Охир, ту чи хел бача?