Талхро ширин фурӯ бурдан ба ком,
Гиряро бо рӯи хандон зистан!

Дардро, то ки бурун н-ояд, ба дард
Дошта дар зери дандон, зистан!

Парваридан рӯҳро аз тан раҳо,
Болафшон чун уқобон зистан!

Дар фарози осмони зиндагӣ
Абри гирён, шамси тобон зистан.

Зиндагонӣ чист, эй ҷон, зистан,
Теғ дар дил, захм дар ҷон зистан…
Июни 2011

МАРГ

Марг аз рӯзи нахустин бо мост,
Дар таҳи бистару болин бо мост.

Гиряду ханда кунад ҳамраҳи мо,
Ҳамчун оинаву оин бо мост.

Гоҳ зангӯла занад дар дили мо,
Ки шитобед, ки таскин бо мост.

Матлаъи ӯ хати ожанги ҷабин,
Чораат чист, ки чун чин бо мост.

Дар қудуме, ки гузорем ба хок,
Дар замин ё ба сари зин бо мост.

Аз ҳама ёр вафодортар аст,
Дар ҳама лаҳза, ки ҳамшин бо мост.

Ҷони мо мурғи гирифтори қафас,
Ӯст чун силаи симин, бо мост.

Ӯ давои ҳама дарду доғ аст,
Додрас, довари дерин бо мост.