Зарпечаки забунӣ сад киштаро фурӯ бурд,
Дар ин замини зархез ин дона чун баромад?!
06.02.2012.

БИДИДАМ, МУРҒАКЕ

Бидидам, мурғаке, к-андар қафас буд,
Шикастабол, бишкастанафас буд.

Касе, ки дом бинҳодаш, чӣ дил дошт?
Касе, ки кард дар бандаш чӣ кас буд?

Ҳар он қадре, ки сар мезад, чӣ ҳосил,
Ҳар он қадре, ки пар мезад, абас буд.

Маро аз ҳоли зори рӯзгорам
Ишорат аз Худо ин қадр бас буд

Барои мурғак ин зиндони даҳшат,
Барои одам ин танҳо ҳавас буд.

Гаҳе нолон, гаҳе хомӯшу музтар,
Ҳама додаш ба ёди Додрас буд.

Варо з-ин боғи хуррам як биёбон,
Вале озод будан, беш бас буд.

Бидидам, мурғаке андар қафас буд,
Маро мурғак, ту гӯи дар нафас буд.
Май, 2016

ДАР ЗИМИСТОН

Дар зимистон чӣ баҳорест гулафшону шигарф!
Гулнисоранд дарахтон ҳама ҷо аз гули барф.

Навдаҳо мисраи розанду паёми эзид,
Ба алифбои муҳаббат, ту бихон ҳарф ба ҳарф.

Боғи гулҳои сафед асту таманнои сафед,
Шаҳри мо шаҳри сафедист ҳама тарф ба тарф.