• Хола қурбоққа, ҳо, холақурбоққа, нонро тезтар пазед, ки шавҳарам ҳозир гушна монда меояд.

• Қур-қур, - кард қурбоққа.

• Ҳа, тезтар пазед! - гуфт духтар.

Мард дар воқеъ гурусна монда омада дид, ки на танӯр тасфидагию на нон пухтагӣ. Ҳайрон шуда пурсид:

• Канӣ нони гармат?

• Ҳозир холақурбоққа пухта медиҳад! - гуфт духтар.

• Кадом холақурбоққа?

• Ҳамон холақурбоққа, ки дар чоҳ зиндагӣ мекунад, - гуфт духтар. Мард рафта ба чоҳ нигоҳ кард, ки нонҳои рост кардагӣ дар қаъри чоҳ чаппаю каҷу килеб шуда хобидаанд.

• Эҳ, ман туро аз аппаҳоят баақлтар гӯям, ту аз онҳо беақлтар будай, - гуфту духтарро аз ҳавлӣ бароварда пеш кард.

Духтар куҷо рафтанашро надониста, рафт-рафт, ба як дашт расиду дар канори дашт гиря карда нишаст. Аз куҷое як акка ких-ких садо бароварда, парида омада, ба наздаш нишаст.

• Ҳа, мурғаки ких-ких, туро шавҳарам фиристод? - гуфта пурсид. Акка боз ких-ких садо баровард.
• Чӣ, шавҳарам мехоҳад, ки ман баргардаму бо вай оштӣ кунам? - пурсид духтар.

Акка боз ких-ких гуфт.