Оғози саҳна бад набуд, агар зан астағфуриллоҳ мегуфт, мисли он ки шайтони алайҳилаъна баъди анҷоми викторина вайро дубора ба рехтани хуни ноҳақ тариқи кимиёи бузург ҳидоят намуд ва ў ҳамин суханро ба забон оварда, шайтони малъунро аз худ биронд. Оғози саҳна бад набуд, агар шогирдаш дар рўзи викторина ба қалби сӯхтаи вай намакоб намепошид…
"Ба наздикӣ дар ҳамсоякўчаи мо…" Ин садое буд, ки чун путк ба гўшаш мезад ва қалби акнун моломоли дардашро боз ҳам озурдатар месохт. Баъди гузаштани викторина Ёсуман дигар бор бо он ҷиҳози тиллоӣ худро ороиш надод. Рафту суҳбати ду ҳамкорро дар алоҳидагӣ медид, гумон мекард, ки дар бораи вай чизе мегўянд ва агар касе ба дари хонаи иҷорааш ангушт мезад, аз мавҷи хаёлоти ботил дилаш фишурда мешуд.
Ҳамаи инро сабаб як буд…
Бо оҳанги зиндагӣ ҷӯр насохтани торҳои қалби хеш…
Ҳамаи инро сабаб як буд…
Аз ҳирси пулу мол шуда пой ба болои қонун гузоштанд, ҳарчанд…
Оғози афсона нек буд…
Оғози афсона ширин буд…

• Биё ба барам…
• Шарм намедоред?
• Аз чӣ?
• Аз он чи ки бо духтари ношинос чунин суханони болохонадор мегўед?
• Магар ин гуноҳ аст?
• Албатта, шуморо зану фарзанд будагист, аққалан андешаи онҳоро бикунед.
• Андеша мегўй?
• Ҳа, андеша.
• Қарсак аз ду даст гуфтаанд, мефаҳмед.
• Яъне, ки навои дили шумо ва ҳамсаратон бо ҳам ҷўр нест.
• Қариб ҳамин хел?