Ин аввалин суолҳое буданд, ки тўфони андешаҳо баҳраш арзонӣ дошт. Сорбони Ҳомид даст ба пешонӣ бурда лаҳзае боз чашмонашро пўшид то он гирдбоди бесарунуги аз тўфон бархоста омехта шавад…
– Исто, о дар чунин вақт зани шавҳардор, зане ки дар Шарқ ба камол расидааст боз ба назди кӣ меравад? – чун вулкон нидое бурун омад аз вуҷудаш.
– Наход дар ҳақиқат ҳам ў ба назди шавҳараш рафта бошад?
– Боз ба назди кӣ мешуд, магар зани мусулмон он, ки хонаи обод дорад, метавонад шабона ба назди дигар кас равад.
…
Сорбони Ҳомид ин дафъа шикасти хешро дар назди қалбаш ҳис намуд, ки муҳри хомўшӣ ба лаб гирифт.
Ў оҳиста дари хонаи хобро кушода, нуг – нуги по то пеши бистараш рафт ва ҷомаро болои курсие гузошта худро ба бистар гирифт ва шабчароғро хомўш кард…

... 63 …

Гузориши ваколатдори кофтукови ҷиноятиро Ҳамид Ҷовид на як, балки ду маротиба хонд ва танҳо баъди ин ўро ба наздаш даъват намуд.
– Шояд то аниқ намудани ҳолатҳои кор боз ягон ҳафта сабр намоем.
– Метарсам, ки дар ин муддат Ҳотам Илёс боз қадаме аз мо пештар нагузорад.
– Шумо гумон доред, ки вай аз он ҷо ҳам фирор хоҳад кард?
– Охир ў наметавонад як умр дар беморхона истад.
– Рафту ў дар ҳақиқат ҳам бемор бошад чӣ?
– Беморро чӣ ҷойи пинҳон намудан.
– Дар ҳақиқат суханони шумо ҳам ҷон доранд, ман худи ҳозир бо сардори РКД маслиҳат мекунам.
– Бо Асад Ғанӣ чӣ? – хандида гуфт Сорбони Ҳомид.
– Прокуратураро дар айни вақт ба ҳоли худаш мегузорем, аздусар онҳо ба мо боварӣ надоранд.