Дили ойинабанд

---

Маро кобӣ, вале ҳар гаҳ наёбӣ,
Зи рӯзу шаб ба меҳру маҳ наёбӣ.
Нағунҷам ҳеҷ дар роҳу нигоҳат,
Ки чун кӯҳ астаму чун каҳ наёбӣ.

---

Бурун аз чашми ту ахтар нахоҳам,
Ниҳон аз он нигаҳ озар нахоҳам.
Ба ғамҳои ту одат кардам он қадр,
Ки шодӣ аз каси дигар нахоҳам!

---

Рухашро моҳ гуфтам, дар шабам нест,
Ба пешонӣ кафи ӯ дар табам нест.
Зи талхиҳои умрам шиква дорам,
Лабашро қанд гуфтам, дар лабам нест.

---

Ба Афзалшоҳ ҳар дил ошён аст,
Ба Афзалшоҳ танҳо дил ҷаҳон аст.
Ҳазорон сол дар чашмони тақдир
«Ҷавонӣ рафт!» гуфту худ ҷавон аст.

---

Дигар набвад дубайтихонии ман,
Ба пойи ту ҳама сармонии ман.
Хатамро, ки набинвиштӣ ҷавобе,
Бихон акнун хати пешонии ман...