Бузургмеҳри Тоҷиддин

---

Зи дил беҳ гуфтаӣ бому дареро,
Зи сар беҳ дидаӣ симу зареро.
Зи ман бигзаштанат кори хато нест,
Агар аз ман биёбӣ беҳтареро.

---

Хазон кардӣ маро, гарчи баҳорӣ,
Чӣ дорӣ, гар муҳаббатро надорӣ.
Агар безорӣ аз номи ман имрӯз,
Варо фардо ба фарзандат гузорӣ!

---

Биё, сабри гаронамро бубахшам,
Нигаҳ кун, дидагонамро бубахшам.
Ба сӯям пештар аз марги ман ой,
Дилам бо туст, ҷонамро бубахшам.

---

Ту эй шӯри дили дарёии ман,
Биё, к-охир шавад раҳпоии ман.
Маро то як нафас танҳо намонӣ,
Вафо омӯз аз танҳоии ман.

---

Сухан аз Рӯдакӣ оғоз дорад,
Ба дил аз дил раҳи парвоз дорад.
Нагардад куҳна ҳарфи Рӯдакӣ ҳеҷ,
Ҳазоронсола ин эъҷоз дорад.

---

Ду чашмат осмони каб-кабуд аст,
Маро танҳо дар он асли вуҷуд аст.
Дили ойинабандамро нигаҳ дор,
Ки аз ойинаи дасти ту будаст.