Дили ойинабанд

---

Маро умре бувад бо худ ситеза,
Қароре нест бо бахти гуреза.
Туӣ бо дигаре дар кӯча хандон,
Зи оҳам нам шавад чашми тиреза.

---

Шабе чун маҳ намехуфтӣ, чӣ мешуд?
Ҳадиси нур мегуфтӣ, чӣ мешуд?
Ба қасди рӯзгоре, ки зи ман рафт,
Агар аз ман намерафтӣ, чӣ мешуд?

---

Ту хушному маро бадном будан,
Ба пеши себи рӯят хом будан.
Зи нокомии ман гар комронӣ,
Бихоҳам то абад ноком будан.

---

Лабат аз ваъдаҳои хом гӯяд,
Ба роҳат гул зи ашкам гарчи рӯяд.
Намебудам ба рӯйи даҳр, эй кош,
Каси нобударо чашми ту ҷӯяд.

---

Ҳамон гумгаштаро мекобам имрӯз,
Зи соат пештар биштобам имрӯз.
Ба фардоям қасам, дурӣ наҷӯям,
Агар он моҳрӯро ёбам имрӯз.

---

Дили бо ғайр шодатро бубахшам,
Накардӣ ёд, ёдатро бубахшам.
Хатои бехатоии маро бахш,
Хатоҳои зиёдатро бубахшам.
Бузургмеҳри Тоҷиддин

---

Барои ҷон танатро хостам ман,
Ба ашкам доманатро хостам ман.
Барои ҳалқаи дастони кӯтоҳ
Зи гардун гарданатро хостам ман.

---

Майи сурхи лабонатро бинӯшам,
Дар оғӯшат шавам обу биҷӯшам.
Ду чашматро агар аз ман бипӯшӣ,
Ду чашмамро зи ду дунё бипӯшам!

---

Ба ту дигар шикоят ҳам надорам,
Ба лаб номи туро, асло, наорам.
Маро бигзоштӣ танҳо ба олам,
Ки оламро кунун танҳо гузорам.

---

Биё, ки меравам бо роҳи дарё
Зи домони фарохи дашту саҳро.
Ба чашми ман биё имрӯз, имрӯз,
Ки фардо меравам аз чашми дунё.

---

Маро бе хоки пойи ту саре нест,
Ба ҷуз чашму дилат бому даре нест.
Бихондам шеър дар дунё ҳама умр,
Ба мисли бӯсаат шеъри таре нест.

---

Ба мисли зиндагӣ гарчи шитобам,
Туро бо худ дар ин дунё наёбам.
Ту бо дирӯз дигар барнагардӣ,
Ман аз имрӯзу аз фардо бикобам.