Дили ойинабанд

---

Маро ҷӯ аз хатои худ, ки ёбӣ,
Зи хоки зери пои худ, ки ёбӣ.
Наёбӣ гар, шаби Ялдо нишин зор,
Як ахтар аз самои худ, ки ёбӣ.

---

Маҷӯ дар ман нишоне аз ҳавасҳо,
Ки ҳар як рафт охир бо нафасҳо.
Шавам кай такягоҳи қиблагоҳам,
Ки дорам шарм аз кори чигасҳо…

---

Бимон дар пои гардун бар сари ман,
Бимон ҳамтои гардун бар сари ман.
Ба пои ту, ки дар ҷои заминам,
Бимон дар ҷои гардун бар сари ман.

---

Ба рӯз, эй офтобам, дар куҷоӣ?
Ба шаб, эй моҳтобам, дар куҷоӣ?
Гаҳе бо зиндагонӣ, гоҳ бо марг
Ду дунёро бикобам, дар куҷоӣ?

---

Хатоҳое, ки кардам, мешуморам,
Сари роҳат нишаста, тавба дорам.
Гули рухсораҳоятро наорад,
Дареғи омаданҳои баҳорам.

---

Маро монандаи дарёст рафтан,
Аз ин дашту аз ин саҳрост рафтан.
Зи ту то ёри дигар рафтани ман
Аз ин дунё ба он дунёст рафтан.