Дили ойинабанд

---

Дардест ҷаҳонию чӣ ғавғо дорем,

• Андар сари як вожа чӣ даъво дорем?
  Мирем ману ту аз "забондонӣ"-и хеш,
  Чун баҳси "карона" ё "куруно" дорем!

---

Беҳуда чу рӯз гуфтаам рӯятро,
Ялдошаби умр гуфтаам мӯятро.
Эй кош, ду дунё гунаҳамро бахшад,
Дунёи ягона гуфтаам кӯятро.

---

Гармӣ зи дили ҳаво чу бигрехт, биё,
Хоки қадами туро қалам бехт, биё.
Аз резиши мӯҳои сиёҳи сари ман
Мӯҳои сафеди осмон рехт, биё.

---

Эй кош, ману ту аз дилу ҷон гӯем,
Гуфтем зи имону зи виҷдон гӯем.
Як умр Зарафшону Бадахшон гуфтем,
Як лаҳза нишин, ки Тоҷикистон гӯем.

---

Шодии ман аз дасти ғамат бемор аст,
Фарёди ман аз сукути ту безор аст.
Рафтиву наомадӣ чу хуршеду чу моҳ,
Рӯзу шаби ман ба домани озор аст.

---

Аз дур манам, ки аҳли дунё донад,
Ашъори ҳазорсолаамро хонад.
Ҳар чизи ман аст дар ҷаҳон тоҷикӣ,
Тоҷик ба тоҷикияташ мемонад!