САРСУХАН
Адабиёт фанни инсоншиносист ва тавассути таълими он мероси маънавии халқ омўзонида ва бақои умри миллат таъмин мешавад. Омўзиш, таълим ва мақоми ин фан ба хусус, дар даврони соҳибистиқлолӣ ва ҷаҳонишавӣ басо афзудааст.
Таълим ва тадриси адабиёт дар парвариш ва камолоти инсон, ташаккули ёди таърихӣ, худогоҳӣ ва худшиносии миллии наслҳо нақши созанда дошта, ҳаёти ҷомеа ва зиндагии маънавии инсониятро тавсиф мебахшад. Вазифаи аслии адабиёт тарбияи инсони бомаърифат ва рисолатманд буда, омўзиши он ҳадафи миллӣ, ватанхоҳӣ ва инсонпарварӣ дорад.
Адабиёт фақат фанни таълимӣ набуда, василаи камолоти маънавии фарзандони миллат, ташаккули ҳамаҷонибаи шахсият мебошад ва барои омўхтани илмҳои дигар заминагузор аст. Азбаски адабиёт василаи дарк ва таҷассуми образноки воқеияти зиндагист, таълими он дар тарбият, бунёди маънавӣ, ахлоқӣ, зебошиносӣ ва таҳзиби инсонҳо муассир аст. Омўзиши адабиёти тоҷик яке аз омилҳои муассири дарки ғановати забони тоҷикӣ буда, ба ташаккули маҳорати забондонии хонандагон мусоидат менамояд.
Асосҳои методологӣ, роҳу усул ва шеваҳои тадриси фанни адабиёти тоҷик дар замони муосир то андозае дар китоб ва дастурҳои ҷудогона муайян шудааст. Мутаассифона, то кунун китоби дарсии муътамад ва комили усули таълими фанни адабиёти тоҷик дар муассисаҳои таълимӣ мавҷуд набуда, донишҷўён ва омўзгорон ба он эҳтиёҷманд мебошанд.
Бинобар ин, дар заминаи мушоҳида ва таҷрибаи чандинсола дар соҳаи маорифи кишвар адабиётшинос ва методисти шинохта А. Муллоев кори хайр ва судмандеро анҷом дода, эҳтиёҷоти толибилмон ва омўзгоронро бо эҷод ва нашри китоби «Методикаи таълими адабиёти тоҷик» таъмин намудааст.