Ҳама розҳо бар ту бояд кушод,
Ба жарфӣ бибин, то чӣ ояд-т ёд.

Аз он хоби бад шуд дили ман ғамӣ,
Ба мағз андаровард лахте камӣ.

Набастам ба ҷанги Сиёвуш миён,
Наёмад аз ў низ моро зиён.

2050 Чу ў тахти пурмоя падруд кард,
Хирад тору меҳри маро пуд кард.

Зи фармони ман як замон сар натофт,
Зи ман ў ба ҷуз некуиҳо наёфт.

Супурдам бад-ў кишвару ганҷи хеш.
Накардем ёд аз ғаму ранҷи хеш.

Ба хун низ пайвастагӣ сохтам,
Дил аз кини Эрон бипардохтам.

Напечидам аз ганҷу фарзанд рўй,
Гиромӣ ду дида супурдам бад-ўй.

2055 Пас аз некуиҳову сад гуна ранҷ,
Фидо кардани кишвару тоҷу ганҷ

Гар эдун, ки ман бад сиголам бад-ўй,
Зи гетӣ барояд басе гуфтугўй.

Бар ў-бар баҳона надорам ба бад,
Гар аз ман бад-ў андаке бад расад,

Забон баркушоянд бар ман меҳон,
Дурафше шавам дар миёни ҷаҳон.

Зи дад тездандонтар аз шер нест,
Ки андар дилаш бими шамшер нест,

2060 Агар баччаи ў шавад дардманд,
Кунад марғзоре табоҳ аз газанд.

Агар мо бишўрем бар бегуноҳ,
Писандад куҷо довари хуру моҳ?!

Надонам ҷуз он к-аш бихонам ба бар
В-аз эдар фиристам-ш сўи падар.

Агар гоҳ ҷўяд, гар ангуштарӣ
Аз ин буму бар бигсилад доварӣ».

Бад-ў гуфт Гарсеваз: «Эй шаҳрёр,
Магир инчунин кори пурмоя хор.

2065 Аз эдар гар ў сўи Эрон шавад,
Бару буми мо пок вайрон шавад.