корхонаҳо; ҳуқуқ ба музокироти коллективӣ ва ҳуқуқ ба корпартой.

1. Ҳуқуқ ба меҳнат аввалин бор дар Эъломияи умумии ҳуқуқи инсон ҳамчун муҳимтарин ҳуқуқи эътирофшудаи байналмилалӣ эълон карда шуд. Баъдан ҳуқуқ ба меҳнат дар Паймони байналмилалӣ оид ба ҳуқуқҳои иқтисодӣ, иҷтимоӣ ва фарҳангӣ ва Хартияи иҷтимоии Аврупо ба таври муфассал инъикоси худро ёфт. Паймони байналмилалӣ оид ба ҳуқуқҳои иқтисодӣ, иҷтимоӣ ва фарҳангӣ, ҳуқуқ ба меҳнатро ҳамчун ҳуқуқи ҳар як шахс барои ба даст овардани даромад аз коре, ки ӯ озодона интихоб намудааст ё ба он озодона розӣ аст, маънидод мекунад. Ҳамин тариқ, Паймони мазкур ба озодии меҳнат, интихоби кори мушаххас ишора намуда, минбаъд ӯҳдадории давлатро на танҳо ҷиҳати эътироф кардани ҳуқуқ ба меҳнат, балки ҷиҳати андешидани чораҳои дахлдор барои таъмини ин ҳуқуқ низ муқаррар менамояд.

2. Баробарҳуқуқӣ дар меҳнат ё манъи табъиз дар меҳнат, баробарӣ дар татбиқи ҳуқуқ ва озодиҳои инсон, ҳуқуқи ҳар як шахсро ба ҳимояи баробар аз тарафи қонун ифода мекунад. Силсилаи меъёрҳо ва муқаррарот оид ба манъи табъиз дар соҳаи меҳнат ва муносибатҳои меҳнатӣ дар конвенсияҳо ва тавсияҳои ТБМ ҷой дода шудаанд. Муҳимтарини онҳо Конвенсияи № 111 мебошад. Он давлатҳоро ӯҳдадор месозад, ки сиёсати миллии ба таъмини баробарии имкониятҳо дар соҳаи меҳнат ва шуғл равонашударо таҳия ва амалӣ намоянд, то ҳамагуна табъиз дар ин самт барҳам дода шавад.