Эй, гар набаромадӣ ту бо мо,
Бе мо набаромадӣ, азизам.
Пеш аз ту ки ҷони мо баромад,
Танҳо набаромадӣ, азизам.
Хушрӯ чу кабӯтари сафеде
Аз лона баромадӣ, азизам.
Монанди худӣ даромадиву
Бегона баромадӣ, азизам.
Ошиқ шудию дареғ, чун мо
Шайдо набаромадӣ, азизам.
Маҷнун шудаму дареғи саҳро,
Лайло набаромадӣ, азизам.
Девонаи ҳот карда моро,
Мастона баромадӣ, азизам.

Гуфтам, ки Худо, зи дар дароӣ

Гуфтам, ки Худо, зи дар дароӣ,
Боре на зи дар дигар бароӣ.
Аз тори ҳаво чу як парие
Хушрӯ бипарию пар-пар оӣ.
Бигзор, дигар нахезам аз хоб,
Дар хоби хушам агар дароӣ.
Чун сарви баланди нозанине,
Шинам ба барат, ба сар бароӣ.
Монанди санавбарони хушбар
Бо дилбарият ба бар бароӣ.
Дар шохи ҷавониям нишинӣ,
Эй мурғи саро, ба сар сароӣ.
Бемор шудем зору безор,
Аз ёр ту бехабар чароӣ?!
Фарёд занам, фариштаи ман,
Саршори фар ин сафар фароӣ.
Бо нолаи талхи зор зорам,
Эй кошки, лабшакар, дароӣ.