Дасташ бигирифтаму бирафтам,
Гуфто, ба Худо, чӣ кор дорӣ?
Гуфтам ба ту ҳаст кор моро,
Ту худ ба Худо чӣ кор дорӣ?
Рафтем ба хилвате, ки гуфто:
Моему Худо, чӣ кор дорӣ?
Бурдам ба камар-ш даст, гуфто:
Ту дону Худо, чӣ кор дорӣ?
Ду бӯса задам, бирафт аз ҳуш,
Гуфтам, санамо, чӣ кор дорӣ?
Оҳиста бигуфт, аз ту моем,
Эй бачча, биё, чӣ кор дорӣ?

Додӣ ту агар ҳазор фандам

Додӣ ту агар ҳазор фандам,
Гуфтӣ, ки туро ба фанд бандам,
Моро чӣ хаёл кардӣ, охир,
Дидӣ, ки задӣ ту дар камандам?!
Май хӯрдам аз он ду чашми мастат,
Ҳай-ҳай, майи нобро писандам.
Оваҳ, зи гулӯи ту газидам,
Аз баҳри газак лимӯт кандам.
Дар хона баранд агар гумонам,
Гуфтӣ, ба Худо, ки мекушандам.
Бобот бикушт мардумонро,
Шуд кушта худаш, бигир пандам!

Ту дода ба мо ду бор бӯса

Ту дода ба мо ду бор бӯса,
Мо масти хаёли чор бӯса.
Гуфтӣ ба ду бӯса масти мастӣ,
Девона шавӣ ба чор бӯса.
Гуфтӣ, ки биё ба хона имшаб,
Якбора диҳам ҳазор бӯса!