БИРАВ

Дорам ҳаё зи рӯи ту, эй беҳаё, бирав,
Ҳатто дигар ба хонаи ёдам наё, бирав.

Рафт он чӣ рафт, хандаи гул номукаррар аст,
Ҳарфе мазан, ки хастаам аз моҷаро, бирав.

Ноошноии ту дилам кард оқибат,
Бо сад ҳазор ғуссаву ғам ошно, бирав.

Овозаат ба чарх расид, эй намакшикан,
Дигар накарда ҳамчу занон иддао, бирав.

Пайванди ту ба Робиа дигар чӣ ҳоҷат аст?
"Ишқат ҷудову меҳр ҷудо, дил ҷудо бирав!"